གྲོགས་ཁྱོད་ཉམས་ལེན་སྐྱོང་འདོད་ན།
༄༅། །གྲོགས་ཁྱོད་ཉམས་ལེན་སྐྱོང་འདོད་ན། མཚུངས་མེད་བླ་མའི་ཞབས་ལ་འདུད། །གྲོགས་ཁྱོད་ཉམས་ལེན་སྐྱོང་འདོད་ན། །བླ་མ་སངས་རྒྱས་དངོས་མཐོང་བའི། །མོས་གུས་དྲག་པོས་གསོལ་བ་ཐོབ། །དབང་བཞི་ལོངས་ལ་ཐུགས་ཡིད་བསྲེས། །ད་ལྟའི་ཐ་མལ་ཤེས་པ་འདི། །བཟང་འདོད་ཞེན་པས་མ་བསླད་ཅིང་། །ངན་རྟོག་འཇུར་བུས་མ་བཅིངས་པར། །རང་བབས་སྒོམ་གྱི་ངོ་ཏིར་ཟུངས། །ལེགས་སུ་རེ་དང་ཉེས་ཀྱིས་དོགས། །གནས་ན་དགའ་དང་འགྱུ་ཡིས་སྡུག །སྒྲིམ་ཀློད་བྱེད་བློ་མ་རྩོམ་པར། །གཤིས་ལུགས་ངང་དུ་བབས་ཀྱིས་ལྷོད། །རྣམ་རྟོག་ཕྱི་རུ་སྤྲོ་བ་དང་། །རིག་པ་ནང་དུ་བསྡུ་བ་སོགས། །བཅས་བཅོས་དགག་སྒྲུབ་མ་བྱེད་པར། །གུ་ཡངས་ངང་དུ་ཁྲོལ་ལེར་ཞོག །བལྟར་མེད་སེམས་ཀྱི་ཆོས་ཉིད་ལ། །མཐོང་འདོད་རེ་བ་མ་ཆེ་བར། །གང་ཤར་ཆོས་སྐུའི་ཡོ་ལང་ཆེར། །རྒྱ་གྲོལ་ཕྱལ་པར་གློད་ཅིག་ཨང་། །ཚོགས་དྲུག་ལྷུག་པ་བུ་ཆུང་སེམས། །བཟང་རྟོག་ཞེན་མེད་འཇའ་ཤར་འདྲ། །ངན་རྟོག་སྦྲུལ་མདུད་རང་གྲོལ་བཞིན། །རྣམ་ཀུན་བག་ཆགས་རྗེས་གསོག་བྲལ། །ཆགས་ན་ཆགས་མཁན་རྩ་བ་ཆོད། །ཞེན་ན་ཞེན་མཁན་རྩད་ནས་ཕྱུངས། །སྟིང་ན་རྩལ་སྦྱངས་ཉམས་བོགས་དབྱུང་། །མཉམ་བཞག་རྗེས་ཐོབ་ངོ་བོར་ཁྱེར། །དུས་རྒྱུན་ངེས་འབྱུང་སྐྱོ་ཤས་དང་། །ཞེན་ལོག་དཀའ་སྤྱོད་སྒྲུབ་ཚུགས་བརྟན། །མོས་གུས་སྙིང་རྗེ་བསྐྱེད་རྫོགས་དང་། །ཤི་ཡང་འགྱོད་མེད་ཚགས་ཚུད་མཛོད། །དེ་སྐད་དགེ་སྦྱོང་བི་ཛ་ཡས། །ལུང་དང་བླ་མའི་མན་ངག་དང་། །རང་གི་མྱོང་བ་བསྟུན་ནས་བྲིས། །དགེ་བས་ཁྱེད་ལ་ཕན་གྱུར་ཅིག །